
ខេត្តមណ្ឌលគិរី ៖ ប្រជាពលរដ្ឋរស់នៅឃុំចុងផ្លាស់ ស្រុកកែវសីមា បានប្រមូលផ្តុំគ្នាប្រមាណជិត៣០០នាក់ នៅមុខសាលាឃុំ កាលពីរសៀលថ្ងៃទី១៩ ខែឧសភា ឆ្នាំ២០១៨ ស្នើរសុំកិច្ចអន្តរាគមន៍ពីសម្តេចប្រមុខរាជរដ្ឋាភិបាលកម្ពុជា ជួយដោះស្រាយលើករណីក្រុមហ៊ុនរ៉ែមាសរបស់ចិន Rong Cheng រំលោភលើដីសហគមន៍រ៉ែមាសចុងផ្លាស់ដែលអូសបន្លាយអស់រយៈ ពេលជាច្រើនឆ្នាំ ។

ប្រជាពលរដ្ឋបានអះអាងថា «ក្រុមហ៊ុនរំលោភលើរណ្តៅរ៉ែរបស់សហគមន៍របស់យើងខ្ញុំ ដូច្នេះយើងសុំឲ្យសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលជាម៉ែជាឪរបស់យើង ជួយប្រាប់ទៅអាជ្ញាធរ និងក្រសួងរ៉ែឲ្យពន្លឿនការដោះស្រាយឲ្យពួកគាត់ផង» ។

សូមបញ្ជាក់ថា ជម្លោះរវាងក្រុមហ៊ុនចិន «Rong Cheng» និងប្រជាសហគមន៍រ៉ែមាសចុងផ្លាស់បានកើតឡើងយូរឆ្នាំហើយ ប៉ុន្តែមិនទាន់មានដំណោះស្រាយនៅឡើយទេ ដោយប្រជាពលរដ្ឋបានចោទទៅក្រុមហ៊ុនថា បានរំលោភយកដីធ្វើរ៉ែពួកគាត់ ទៅធ្វើអាជីវកម្ម ។ ជម្លោះនេះត្រូវបានលោករដ្ឋមន្ដ្រីក្រសួងរ៉ែ និងថាមពលជាបន្ទាន់ កាលពីកន្លងទៅ បានចាត់ឲ្យមន្ដ្រីជំនាញមួយក្រុម រួមមានជាមួយមន្ទីររ៉ែ និងថាមពលខេត្តមណ្ឌលគិរី ចុះទៅដោះស្រាយផងដែរ ។

កាលនោះ លោករដ្ឋមន្ដ្រី ស៊ុយ សែម បានសង្កត់ធ្ងន់ថា បើសិនជាមន្ដ្រីជំនាញរបស់លោករកឃើញថា ក្រុមហ៊ុនពិតជាបានធ្វើសកម្មភាពជីករករ៉ែមាស រំលោភទៅក្នុងដីសហគមន៍ក្រសួងនឹងសរសេរលិខិតជាបន្ទាន់ឲ្យក្រុមហ៊ុនដកចេញ ហើយបើមិនស្ដាប់នឹងត្រូវចាត់វិធានការភ្លាម ។

ជុំវិញករណីខាងលើនេះ លោក លាភ លឹមគុណ មេឃុំចុងផ្លាស់បានឲ្យដឹងថា លោកនឹងនាំយកញាត្តិស្នើសុំរបស់បងប្អូនអ្នកភូមិដាក់ជូនថ្នាក់ដឹកនាំ ដើម្បីផ្តល់ការអនុគ្រោះ សម្រាប់ពួកគាត់អាចប្រកបរបរចិញ្ចឹមជីវិតប្រចាំថ្ងៃ ជៀសវាងការចំណាកស្រុកក្រៅប្រទេសដែលប្រឈមគ្រោះថ្នាក់នានា ។

លោកមេឃុំបានបន្តថា ចំពោះការលើកឡើងថា សហគមន៍មានប្រើប្រាស់សារធាតុគីមី ហាមឃាត់ ខុសច្បាប់របស់ក្រសួងរ៉ែ និងថាមពលក្នុងនាមលោកជាអាជ្ញាធរក្នុងមូលដ្ឋាន សូមបដិសេធយ៉ាងច្បាស់ថា គ្មានការប្រើប្រាស់ សារធាតុគីមី គ្រប់ប្រភេទក្នុងតំបន់របស់លោកគ្រប់គ្រងទេ ៕



No comments:
Post a Comment